Claochlú - Obair mhór ar bun ag scríbhneoirí óga sa Spidéal

Image
CLAOCHLÚ 4

Claochlú  - Obair mhór ar bun ag scríbhneoirí óga sa Spidéal!

Chláraigh dáréag déagóir don chúrsa scriptscríbhneoireachta Claochlú ní ba thúisce an mhí seo. Tagann siad le chéile gach Máirt i Stiúideo Cuan sa Spidéal le ceardlanna scríbhneoireachta a dhéanamh.

Is cúrsa úrnua scríbhneoireachta é Claochlú a leagann béim ar fhorbairt na samhlaíochta chun carachtair nua a chruthú a dtiocfaidh athrú iomlán orthu tríd an scéal. Tá oiliúint á cur ar na scríbhneoirí óga i gceird iomlán na scriptscríbhneoireachta - ag cruthú coimhlinte, aistear an charachtair, an struchtúr trí-ghníomh agus an tábhacht a bhaineann le fadhbanna a chruthú i saol an charachtair.


Image
CLAOCHLÚ 2

"Tá ríméad orm go bhfuil an cúrsa seo faoi lán seoil anseo i Stiúideo Cuan. Tá grúpa iontach daoine óga páirteach ann agus iad ag baint taitnimh agus tairbhe as an gcúrsa go dtí seo. Is iontach an deis é do na scríbhneoirí óga seo chun a gceird a fhorbairt agus tá muid thar a bheith buíoch don Chomhairle Ealaíon, Ealaín na Gaeltachta agus Fighting Words as ucht an tacaíocht ar fad chun tabhairt faoi
Claochlú an Fómhar seo. Ní neart go cur le chéile," a dúirt Darach Mac Con Iomaire ó Stiúideo Cuan. 

Leanfaidh an cúrsa Claochlú ar aghaidh go dtí lár mhí na Nollag agus beidh cuairteanna ann ó aoi-chainteoirí chomh maith le neart deiseanna le bheith ag breathnú ar scannáin.


Image
CLAOCHLÚ  1

Tuilleadh le feiceáil